Friday 30 October 2015

Kavita ,Ek kamra tha

      Ek  kamra tha
     Jisme  main rahta tha
     Maa baap ke sang
    Ghar  bara  tha
     Isliye is kami ko
    Pura karne ke liye
    Mehman  bula lete the ham
  
    Fir vikas ka failab aaya
   Vikas us kamre mein nahi sama paaya
   Jo chadar pure privar ke liye bari parti thi
   Us chadar se bare ho gaye
   Hamare har ek ke paaw
   Log jhuth kahte hain
   Kee diwaron mein drarein parti hain
   Hakikat yahi
   Kee jab dararein parti hain
  Tab diwarein  banti hain.

   Pahle ham sab log diwaroin ke bich mein rahte the
   Ab hamare bich mein diwarein aa gayin
   Yah samridhi mijhe pata nahi kahain pahucha gayi
    Pahle main maa baap ke sath rahta tha
    Ab maa baap mere sath rahte hain
    Fir hamne bana liya ek makan
    Ek kamra apne liye
     Ek- ek kamra bachchon  ke liye
    Ek wo chota sa drawingroom
    Un logon ke liye jo mere aage haath jorte the
    Ek wo andar bara sa drawingroom
     Un logon ke liye
    Jinke aage main haath jorta hun
    Pahle main fusfusata tha
   To ghar ke log jaag jaate the
     Main karvat bhi badalta tha
    To ghar ke log so nahi paate the
                     Aur Ab
     Jin dararon ki wajah se diwarein bani thi
    Un diwaron mein bhi dararein par gayi hain
     Ab mein chikhta hun
     To bagal ke kamre se
    Thahake ki aawaj sunayi deti hai
    Aur main sooch nahi paata hun
    Kee meri chikh ki wajah se
    Wahain thahake lag rahe hain
   Yaa un thahakon ki wajah se
    Main chikh raha hun.

   Aadmi pahuch gaya hai chaand tak
   Pahuchna chahta haii mangal tak
   Par nahi pahuch pata sage- bhaayi ke darwaje tak
   Ab hamara pata to ek rahta  hai
   Par  hamein ek dusre ka pata nahi rahta
    Aur aaj main soochta hun
    Jis samridhi  ki unchyi par main baitha hun
    Uske liye maine kitni bari khodi  hain khayiyain
   Ab mujhe apne baap ki beti se jayda
   Apni beti achi lagti hai
    Ab mujhe apne baap ke bete se jayda
   Apna beta acha lagta hai
    Pahle main maa baap ke sath rahta tha
   Ab maa baap mere sath rahte hain
    Ab mera beta bhi kama raha hai
    Kal mujhe uske saath rahna parega
    Aur hakikat yahi hai doston 
   Tamacha mane mara hai
   Tamacha mujhe khana bhi parega.

          
                             (  Sajni ki taraf se)

No comments:

Post a Comment